Intra i vieci gameîni
de li caxe
speîra l'aria da un alba
ruxea uduruxa.
Intul silensio
da oûn virgino rixvilgio
sa liva el pascadur
dal suovo lieto
da ride rapasàde.
Udur da mar
inùnda la stansa,
el vierxo la purtiela,
el raspìra prufondo
cui uoci lusenti
quil prufoûmo
da mar e da tiera istriana.
L'incanto da un curso itièrno
sa ronpo intra'l varxaro
de la luna inpalideîda.
El va xu pa li scale,
el saluda el suovo gato
e la mento sa luntana
tra floûti da sal
sugadi sul veîxo
da un sul d'istà.
El rimo cuntuòrto
su la spala salda
galuòpa pian pian
cun ritmo da oûn paso sigoûro.
El rivido el suòvo ligno
ligà a la reîva
ansiux da iesi sacuià
cun fuorsa.
El sa sento fileîse
intra el seîgo
da veîte divierse
uguali tra lure.
El sa luntana
par iesi sul,
capeî da'l canto,
ascultà dal mar.